Epoka e re e konfrontimit

Në këtë libër autorët kanë analizuar detaje të cilat nuk janë analizuar në këtë nivel në asnjë botim tjetër deri më sot.

Bota ka hyrë në një epokë të re konfrontimi strategjik, ku konkurrenca ndërmjet fuqive të mëdha shtrihet përtej territoreve, burimeve dhe zonave të influencës, duke përfshirë teknologjinë, energjinë, informacionin, hapësirën kibernetike dhe vetë arkitekturën e rendit ndërkombëtar.

Libri Epoka e Re e Konfrontimit: Gjeopolitika e Rusisë, Kinës, Iranit dhe Koresë së Veriut në një Rend Botëror në Ndryshim paraqet një analizë të thelluar të objektivave strategjikë, doktrinave ushtarake dhe instrumenteve të fuqisë së katër aktorëve që pavarësisht dallimeve ndërmjet tyre, bashkohen në kundërshtimin e hegjemonisë amerikane dhe në sfidimin e rendit liberal ndërkombëtar.

Rusia mbështetet te fuqia ushtarake dhe bërthamore, burimet energjetike dhe lufta hibride; Kina ndërthur kapacitetet ekonomike, teknologjike, diplomatike dhe ushtarake në funksion të ngritjes së saj globale; Irani përdor raketat balistike, sistemet pa pilot, programin bërthamor dhe rrjetin e aktorëve të armatosur rajonalë; ndërsa Koreja e Veriut e ka shndërruar arsenalin e saj bërthamor dhe raketor në instrument mbijetese, parandalimi dhe presioni strategjik.

Vëmendje e veçantë në këtë botim i kushtohet afrimit ndërmjet Moskës, Pekinit, Teheranit dhe Phenianit. Megjithëse këto shtete nuk përbëjnë një aleancë të unifikuar, zgjerimi i bashkëpunimit politik, ekonomik, energjetik, teknologjik dhe ushtarak po krijon një bosht gjithnjë e më sfidues për Shtetet e Bashkuara, NATO-n dhe demokracitë perëndimore.

Duke u mbështetur në një gamë të gjerë burimesh të hapura dhe studimesh akademike, libri shqyrton historinë, kulturën strategjike, perceptimet e kërcënimit, ambiciet kombëtare dhe mënyrat e përdorimit të fuqisë nga secili prej këtyre aktorëve.

Ky studim nuk synon të parashikojë se ku dhe kur do të shpërthejë kriza e ardhshme. Ai u ofron politikëbërësve, diplomatëve, ushtarakëve, studiuesve, gazetarëve dhe lexuesve instrumentet analitike të nevojshme për të kuptuar transformimin e sistemit ndërkombëtar dhe forcat që po e drejtojnë botën drejt një periudhe të re rivaliteti, polarizimi dhe konfrontimi.

Mesazhi themelor është i qartë: kërcënimet strategjike nuk mund të parandalohen dhe të përballohen me sukses pa u njohur më parë në thellësi.