Shijet tona , nga nenat te femijet : 99 receta shqiptare

Në Shqipëri kemi një shprehje: “Ushqimin e ha syri”, por dua të shtoj se ndikon edhe dora që e gatuan. Sa u takon brumërave, jo të gjithë ia dalin t’i realizojnë recetat 100%, siç janë, edhe pse përbërësit dhe udhëzimet janë njëlloj. Gjyshet tona punonin pa masa, por me sy, dhe rezultati ishte më i arrirë sesa kur ndiqeshin gramaturat rigoroze. Kështu, hallat e mia bënin kuleçët më të mirë në botë, të cilëve nuk u afrohej as nëna ime dhe as restorantet e traditës në Përmet, që i kanë më të kërkuarit në menutë e tyre.