Nje dritare me shume

Vlash Papa ka qenë arsimtar. Dhe si shumë mësues të brezit të tij, përkushtimi ndaj dijes nuk u kufizua vetëm në klasë. Ai përfaqëson atë brez mësuesish poliedrikë, të cilët krahas misionit fisnik të mësimdhënies, morën mbi supe barrën e ndriçimit të historisë.

Krahas punës në arsim, ai iu përvesh kërkimit dhe studimit të historisë e kulturës për të hartuar historinë e qytetit të lashtë të Beratit. Mblodhi dokumente, shkroi artikuj, studioi figura historike dhe falë pasionit të tij për historinë e vendlindjes, Vlash Papa u bë një nga zërat e parë që hodhi dritë mbi vlerat e Beratit duke na lënë një kontribut të çmuar në historiografi.

Ky botim ka një domethënie të dyfishtë, sepse është redaktuar me aq dashuri dhe vërtetësi nga i biri i tij, Dionis Papa, vetë mësues i historisë. Kështu, kjo vepër kthehet në një dialog të bukur ndërmjet dy brezave mësuesish që i kanë shërbyer arsimit dhe kulturës.