Dy gota vere

Një udhëtim poetik mes mallit, dashurisë dhe rrënjëve të shpirtit

Blerina Dodaj është një juriste shqiptare me origjinë nga Mirdita, e rritur në Shkodër dhe e vendosur më vonë në Durrës. Ndikimi i Shkodrës ka lënë gjurmë të thella në formimin e saj shpirtëror dhe estetik—në dashurinë për artin, feminilitetin, si dhe në ndjeshmërinë ndaj dialektit gegë. Pas një karriere të suksesshme si avokate, pedagoge dhe me një doktoraturë në shkencat juridike, Blerina prezantohet për herë të parë me publikun si poete përmes vëllimit “Dy gota vere”.

Poezinë ka nisur ta shkruajë që në fëmijëri, por ky është libri i saj i parë i botuar—një urë shpirtërore që e mban të lidhur me vendin e origjinës, veçanërisht pas vendosjes së saj prej disa vitesh në Mynih. Vargjet e saj burojnë nga përvojat jetësore, marrëdhëniet e thella njerëzore dhe ndjeshmëria ndaj gjërave të vogla por me rëndësi të madhe.

Gjuhën më të bukur mësova të flas,

kur ti “mam” nuk munde me më thirr.

E rrita veten dhe të ndoqa pas,

mësova sytë të t’i lexoj shumë mirë.

Ky libër është një ftesë për të ndalur hapin, për të ngritur një dolli me kujtimet dhe për të shijuar poezinë si një pije të ngrohtë që shëron e qetëson shpirtin.