Portret gjysheje

Kam mall për shtrëngimin tonë

Kam mall për shtrëngimin tonë! Ndodh rrallë ta ndiej ledhatimin tënd, që tashmë u përket kushedi çfarë shqisave hyjnore. Rastet kur më prek me sy dhe ikën janë më të shumta. Në faqet e librit Portret gjysheje, autorja ndan me lexuesin bisedat e heshtura dhe thirrjet e thella të shpirtit, të ngjashme me një lutje: “Mirupafshim, të pres përsëri! Sa gjëra kam për të thënë, por mbase ti i di!”

Në këtë rrëfim thuajse magjik, figura e gjyshes shndërrohet në dritë, duke u larguar ndoshta në një vend me shkëlqim verbues ku dëgjohen motive këngësh të dashura. Ajo ngatërrohet me një rrezatim mrekullie, duke lënë pas vetëm jehonën e zërit dhe paqësinë e syve. Është ai zë që të jep forcë dhe të thotë: ”Shko përpara me kujdes por dhe guxim, me qëndrimin e drejtë, e palëkundur, kërko të jesh e lumtur!”.

Dhe kur sytë çelen, mbetet dilema nëse lëkundja e shtratit dhe ajo prekje e lehtë ishte thjesht një ëndërr, apo vetë jeta që gjen rrugën për të komunikuar. Ndonëse fjalët rrallë thuhen me zë të lartë, zëri i zemrës dëgjohet gjithmonë: “Të dua shumë, mami Liria, nëna ime e butë, nëna ime e mirë, nëna ime e shtrenjtë!”. Ky libër është një ftesë për të mos lënë kujtimet të zbehen dhe për të vlerësuar çdo moment me njerëzit tanë më të shtrenjtë.