Letra nje poeti te ri

Një thirrje për kthim te vetja dhe fuqia e artit

“Letra një poeti të ri” është një thirrje për kthim te vetja dhe te e brendshmja, pikërisht aty nga ku mund të lindë e bukura dhe artistikja. Përmes dhjetë letrave të tij të shkruara me një stil thellësisht poetik, Rainer Maria Rilke nuk mjaftohet thjesht me dhënien e përgjigjeve për poetin e ri që i kërkon këshilla. Përkundrazi, ai arrin të ndërtojë një tekst universal që prek dimensione të ndryshme të shpirtit njerëzor në përgjithësi, dhe të shpirtit të artistit në veçanti.

Me një subtilitet të jashtëzakonshëm, Rilke na lë si trashëgimi një manifest mbi durimin dhe guximin për t’iu qasur jetës. Ai na mëson se si ta kthejmë edhe gjënë më të thjeshtë dhe të rëndomtë në art, pasi ky i fundit nuk mëton të gjejë me çdo kusht të veçantën, por të zakonshmen ta kthejë në diçka vërtet unike. Një libër i domosdoshëm për këdo që kërkon të thellohet në botën e krijimtarisë dhe të njohjes së vetvetes.

“Mos kërkoni tani përgjigje që nuk mund t’ju jepen, sepse atëherë nuk do të mund t’i jetonit ato. Dhe i gjithë kuptimi i kësaj është që gjithçka të jetohet. Jetojini tani pyetjet. Ndoshta atëherë, gradualisht dhe pa e vënë re, në një ditë të largët do të jetoni në përgjigje.”