Mëndafsh

Një udhëtim poetik mes dëshirës, dashurisë dhe të panjohurës

«Franca, udhëtimet në det, aroma e manave në Lavildië, trenat me avull, zëri i Helenës. Hervé Zhonkur vazhdoi të tregonte jetën e tij, siç kurrë në jetë s’e kish bërë.»

Ky nuk është thjesht një roman. Dhe as një tregim i zakonshëm nuk është. Kjo është një histori drithëruese dhe thellësisht poetike. Zë fill me një burrë që shkel botën anembanë dhe përfundon me një liqen që gjendet aty, në një ditë me erë. Burri quhet Hervé Zhonkur. Liqeni s’dihet se si.

Alessandro Baricco mjeshtërisht end një rrëfim të thjeshtë në dukje, por të ngarkuar me një ndjeshmëri të rrallë. Historia ndjek jetën e Zhonkurit dhe udhëtimet e tij të rrezikshme mes Europës dhe Japonisë së largët e të mistershme në kërkim të vezëve të mëndafshit. Mes këtyre rrugëtimeve ekzotike, libri trajton në mënyrë të ndjeshme temat e dashurisë së heshtur, dëshirës së pashprehur dhe boshllëkut emocional që lë pas kërkimi i diçkaje të pakapshme.

I botuar fillimisht më 1996 dhe i përkthyer në më se tridhjetë gjuhë të botës, “Mëndafsh” u kthye shpejt në një bestseller ndërkombëtar. Suksesi i kësaj vepre qe aq i madh saqë frymëzoi edhe një film të njohur kinematografik me regji të François Girard, duke pasur në kast aktorë yje si Michael Pitt, Keira Knightley dhe Alfred Molina. Një perlë letrare që do t’ju magjepsë e do t’ju mbetet gjatë në mendje!