I dyshuari X

Kur logjika gjeniale kthehet në mburojën e një krimi

Pas divorcit nga një burrë i dhunshëm, Jasuko rrit e vetme vajzën e saj, Misaton, duke u munduar të rifillojë një jetë të pavarur dhe larg gabimeve të së shkuarës. Por qetësia e tyre shkatërrohet kur ish-burri u shfaqet në derë duke i kërcënuar për t’u zhvatur para. Në një moment dëshpërimi dhe humbje kontrolli, Jasuko e vret atë duke e mbytur me një kabllo. Këtu nis ngjarja e jashtëzakonshme e romanit “I dyshuari X”, ku një vrasje rastësore kthehet në një enigmë të pazgjidhshme.

Gjithçka është dëgjuar nga Ishigami, fqinji i tyre i heshtur dhe një ish-profesor matematike me një mendje gjeniale. I shtyrë nga një ndjenjë e thellë dhe e fshehtë, ai vetëofrohet t’i ndihmojë të dyja gratë për të mbuluar krimin, duke thurur një plan mbrojtës të përsosur dhe të denjë për profesionin e tij, pa i lënë absolutisht asgjë rastësisë.

Si në një lojë shahu ku çdo lëvizje është një vëzhgim i hollë i psikologjisë së kundërshtarit, ky libër sfidon lexuesin të mendojë për drejtësinë, fajin dhe natyrën e vërtetë të së mirës dhe së keqes. Një rrëfim i tensionuar dhe plot kthesa që ofron një suspensë dhe finesë unike, duke ju mbajtur të mbërthyer deri në fundin e tij befasues.