Rivale hyjnore

Lidhja magjike e dy gazetarëve në mes të luftës së perëndive

Kur dy gazetarë të rinj dhe rivalë zbulojnë dashurinë përmes një lidhjeje magjike, ata duhet të përballen me vetë thellësitë e ferrit në një luftë mes perëndive, për të vulosur përgjithmonë fatin e tyre. Në faqet magjepsëse të romanit Rivale hyjnore, zbulojmë se pas shekujsh gjumi, perënditë janë zgjuar dhe po luftojnë sërish. Por tetëmbëdhjetëvjeçarja Iris Uinou dëshiron vetëm të mbajë familjen të bashkuar. Nëna e saj është e alkoolizuar, ndërsa vëllai i ka humbur në vijën e frontit. Shpresa e vetme e Irisit është të fitojë promovimin si gazetare në “Gazetën e Outhit”.

Për të përballuar ankthin dhe frikën, Irisi i shkruan letra vëllait dhe i fut ato nën derën e dollapit, por letrat zhduken në mënyrë të mistershme… për t’u shfaqur në duart e Roman Kitit, rivalit të saj të ftohtë por tërheqës në redaksi. Kur Romani fillon t’i përgjigjet fshehurazi, mes tyre lind një lidhje e veçantë që do ta çojë Irisin deri në vijën e frontit, në kërkim të vëllait, të fatit të njerëzimit dhe të dashurisë. Kjo është një përplasje mes dritës dhe errësirës, ku dashuria lind në mes të luftës.

Kritikët mbarëbotërorë e kanë pritur këtë vepër me vlerësime maksimale:

“Lufta mund të jetë kaos, por bukuria e këtij libri është e përsosur.” — The New York Times

“Një botë magjepsëse dhe ndjeshmëria e dashurisë së parë e bëjnë librin e parë të kësaj duologjie fantazie një lexim plot mall dhe tension.” — The Washington Post

“Një romancë e zjarrtë dhe një eksplorim prekës i tmerrit të luftës… me një ndërtim të zgjuar, personazhe të thellë dhe stil shkrimi herë ëndërrimtar, herë të tensionuar.” — Publishers Weekly

“Një tjetër fitore absolute nga Rebecca Ross, e cila po dëshmon me shpejtësi se në botën e letërsisë fantastike, ka pak gjëra që nuk mund t’i bëjë.” — Paste Magazine