E dashur Denise

Një letër e pafund drejtuar Denisës, mes humbjes, egoizmit dhe kërkimit të dashurisë

Një roman me 31 kapituj që ndajnë të njëjtën pikënisje: “E dashur Denise…” Një letër e gjatë, një rrëfim i hapur dhe një plagë që refuzon të mbyllet. Ky është thelbi i një libri që eksploron me guxim temat e humbjes, dashurisë dhe vetmisë më të thellë.

Në çastin kur humbet atë që ti e quaje “gjithçka”, kur ajo që konsideroje si e gjithë bota jote shembet, humbet edhe vetë kuptimi i jetës. Dhimbja ka fuqinë t’i mbyll njerëzit në vetvete dhe t’i shkatërrojë, por ajo që shpesh mbetet e pashprehur është se dhimbja të bën gjithashtu egoist. Gjithçka nis me një thirrje drejtuar Denisës dhe me iluzionin se dashuria mund të justifikojë çdo veprim pa pasur nevojë për gjykim. Megjithatë, dalëngadalë, njeriu e gjen veten të humbur në këtë labirint emocional, aty ku duket se askush nuk mund të të shpëtojë më përveç vetes sate.