Rikthim – Fred Uhlman

Një miqësi magjike në hijen e shkatërrimit nazist

«Gjithçka që dija, atëherë, ishte se ai do të bëhej miku im». Gjermani, viti 1932. Dy djem gjashtëmbëdhjetëvjeçarë ndjekin të njëjtën shkollë ekskluzive në Shtutgart. Njëri është djali i një mjeku hebre, ndërsa tjetri është pasardhës i një familjeje të pasur aristokrate. Mes tyre lind një miqësi e thellë, e pastër, një mirëkuptim i përsosur dhe thuajse magjik. Por vendi ku ata jetojnë po ndryshon thellësisht dhe po zhytet me shpejtësi në errësirën e një diktature vdekjeprurëse. A do të mundet që kjo lidhje e brishtë të mos shkatërrohet nga stuhia e pamëshirshme e historisë?

Në romanin e tij Rikthim, Fred Uhlman sjell një rrëfim me një finesë dhe forcë sugjestive të jashtëzakonshme. I botuar për herë të parë në Shtetet e Bashkuara në vitin 1971, libri korri menjëherë një sukses të madh kudo, si te publiku ashtu edhe te kritika, duke u kthyer në një klasik të letërsisë së shekullit të njëzetë.

Vlerësime nga kritika mbarëbotërore:

“Një nga tekstet më të thella dhe më të pastra mbi vitet e nazizmit në Gjermani. Ndër romanet më të bukura që mund t’u rekomandohen lexuesve, nga mosha dymbëdhjetë vjeç e lart. Pa asnjë hezitim.” — Le Monde

“Një vepër e çmuar që meriton të lexohet nga të gjithë.” — Ian McEwan