Vajza e pirenejve-Living

Është e pamundur të anashkalohet ndikimi i madh që solli Lufta II Botërore ndaj civilëve të kapur në shumë zona ku ajo u zhvillua. Historitë e njerëzve të thjeshtë dhe përjetimet e tyre gjatë luftës, shpesh janë lënë në harresë por kohët e fundit ky fakt ka ndryshuar.

Edhe romani nga Kristin Hannah, “Vajza e Pirenejve”, bashkohet me ato filma apo libra të cilat i kushtohen eksperiencave të njerëzve të zakonshëm, me kurajo të madhe dhe forcë për të mbijetuar në një kohë ku jeta ishte gjëja më e pasigurt në botë.

Heroinat e këtij romani janë dy motra, Viana dhe Izabela. Pasi humbin të ëmën, marrëdhëniet me babain e tyre bëhën gjithnjë e më të ashpra e më të ftohta, ç’ka bën që edhe dy motrat të mos jenë të afërta me njëra tjetren.

Më pas, lufta nis… Viana Moriaku përcjell të shoqin, Antuanin, i cili niset për në frontin e luftës. Ajo nuk beson se nazistët do ta pushtojnë Francën, por ata vërshojnë me trupa të shumta ushtarake, karvanë kamionësh dhe tankesh, avionë që mbushin qiellin dhe bombardojnë të pafajshmit.

Motra e Vianës, Izabela, është një vajzë rebele tetëmbëdhjetëvjeçare, duke kërkuar t’i japë kuptim jetës me pasionin e rrëmbyeshëm rinor. Ajo përfshihet në radhët e Rezistencës dhe bëhet aktiviste e devotshme për kauzën e lirisë. Rrezikon jetën e vet për të shpëtuar shumë jetë të tjera nën pseudonimin “Vajza e Pirenejve”.

Libri tregohet nga një narrator i gjithëdijshëm dhe një grua, tashmë e moshuar dhe e sëmurë, e cili vendos të kthehet në Francë për të pranuar çmime për trimërinë e saj dhe sakrificën gjatë luftës.