Ervin Nezha

Ervin Nezha është një emër i ri dhe i veçantë në letërsinë bashkëkohore shqipe. I lindur në vitin 1992, në Qukës Shkumbin, ai përfundoi studimet në Fakultetin e Historisë dhe Filologjisë, dega Letërsi, në Universitetin e Tiranës. Mjeshtëria e tij si tregimtar u shfaq që me përmbledhjen me tregime “Të vdesësh nën diell”, e cila u vlerësua për stilin befasues dhe ndërtimin mjeshtëror të karaktereve, si vijimësi e denjë e traditës së tregimit shqip. Ervin Nezha ka përfaqësuar Shqipërinë në Panairin e Librit në Lajpcig (Gjermani), së bashku me autorë të tjerë shqiptarë. Në vitin 2022 botoi romanin “Erërat që trazojnë mjegullën”, ndërsa në vitin 2024 romanin “Tri Tavernat”. Në shtypin letrar boton tregime, recensione dhe poezi. Aktualisht punon si mësues i Gjuhës Amtare në vendlindje. "Ervin Nezha shfaqi talent e dorë të mirë që te përmbledhja e tregimeve, me laryshi temash, e me qasje risimtare në shtjellim të tyre. Novela” Erërat që trazojnë mjegullën” ishte një sprovë e hershme që na dëshmoi se Nezha ka aftësinë të shkruajë edhe në format ca më të gjatë. Te “Tri tavernat” pena e Nezhës të imponohet edhe më shumë. Ervin Nezha ka shumëçka për të na thënë: pena e tij është këtu për të mbetur".    - Shqiptar Oseku Ervin Nezha është anëtar themelues i Forum 26. Disa nga librat e tij i gjeni edhe tek leximtari.al.