Shqiperia dhe SHBA ne Arkivat e Uashingtonit

“Shqipëria dhe SHBA në arkivat e Uashingtonit” është një studim historik që sjell në dritë një periudhë vendimtare të historisë së Shqipërisë përmes dokumenteve dhe materialeve arkivore amerikane. Haris Silajxhiçi rindërton në mënyrë kronologjike marrëdhëniet shqiptaro-amerikane nga shpallja e Pavarësisë së Shqipërisë në vitin 1912 deri në pushtimin italian të vitit 1939, duke ndjekur zhvillimet politike, diplomatike dhe shoqërore që përcaktuan marrëdhëniet mes dy vendeve.

Një vend të veçantë në studim zë veprimtaria e Kryqit të Kuq Amerikan në Shqipëri gjatë viteve të para të shtetit të pavarur dhe gjatë Luftës së Parë Botërore, si edhe qëndrimi i Shteteve të Bashkuara ndaj çështjes shqiptare në Konferencën e Paqes në Paris, më 1919-1920. Në këtë histori, një rol të rëndësishëm luan edhe diaspora shqiptare në Shtetet e Bashkuara, e cila u angazhua fuqishëm në mbështetje të çështjes kombëtare dhe të përpjekjeve për konsolidimin e shtetit shqiptar.

Duke i dhënë përparësi dokumenteve arkivore, Silajxhiçi sjell një këndvështrim të veçantë mbi marrëdhëniet shqiptaro-amerikane dhe mbi mënyrën se si Shqipëria u perceptua dhe u trajtua në politikën amerikane në dekadat e para të shtetit shqiptar.