Vizatimet e fshehura

Skicat e frikshme të një fëmije dhe një vrasje e mbetur në hije

Mallori Kuin sapo ka dalë nga një qendër rehabilitimi për personat e varur nga lëndët narkotike, kur pranon të punojë për çiftin Tedi dhe Karolinë Maksuell. Detyra e saj është të kujdeset për djalin e tyre pesëvjeçar, Tedin e vogël. Në trillerin e tij rrëqethës Vizatimet e fshehura, autori Jason Rekulak ndërton një atmosferë ku e përditshmja kthehet papritur në një makth të vërtetë. Mallorisë i hyn menjëherë në zemër kjo punë. Ajo jeton në një shtëpizë të këndshme, del për vrap çdo natë dhe e ndien që, më në fund, jeta po i merr drejtimin e duhur.

Me Tedin krijon një lidhje të veçantë. Ai është një vogëlush i ëmbël e i turpshëm, që nuk i ndan kurrë nga dora lapsin dhe bllokun e skicave, ku zakonisht zënë vend objekte krejt të zakonshme: pemë, lepuj dhe balona. Por një ditë, ai vizaton diçka krejt ndryshe: një burrë që tërheq zvarrë nëpër pyll trupin e pajetë të një gruaje. Fill pas kësaj, krijimet e fëmijës bëhen gjithnjë e më të zymta.

Shumë shpejt, figurat e tij nga viza të thjeshta kthehen në skica të gjalla dhe thellësisht të detajuara, që shpalosin aftësi të mbinatyrshme, shumë larg atyre të një fëmije pesëvjeçar. Malloria fillon të dyshojë se këto janë pamje reale të një vrasjeje të pazgjidhur, të ndodhur kohë më parë, ndoshta të përcjella tek ai nga një forcë e mbinatyrshme. Pavarërisht se e gjitha kjo i tingëllon si çmenduri të tjerëve, ajo vendos të kuptojë domethënien e tyre të errët dhe ta shpëtojë Tedin përpara se të jetë tepër vonë.